Sett ta’ għodod għall-komunikazzjoni dwar it-tilqim
Iċ-Ċentru Ewropew għall-Prevenzjoni u l-Kontroll tal-Mard (ECDC) żviluppa materjal ta’ komunikazzjoni li jista’ jiġi editjat biex jissensibilizza dwar l-EVIP u jiżgura li n-nies ikollhom l-informazzjoni li jeħtieġu biex jieħdu deċiżjonijiet informati dwar it-tilqim.
Is-sett ta’ għodod ta’ komunikazzjoni huwa magħmul minn varjetà wiesgħa ta’ materjali ta’ komunikazzjoni (posters, infografiċi, kards tal-media soċjali, animazzjonijiet, eċċ.) u għandu l-għan li:
- Itejjeb il-litteriżmu fis-saħħa dwar ix-xjenza tal-vaċċini u l-ġlieda kontra l-informazzjoni żbaljata u d-diżinformazzjoni permezz tal-għoti ta’ informazzjoni fattwali.
- Jikkontribwixxi għal żieda fit-teħid tat-tilqim fl-UE/fiż-ŻEE għall-COVID-19 u mard ieħor.
- Jappoġġa/jiffaċilita kampanji nazzjonali tal-Punti Fokali Nazzjonali (NFP).
Il-materjali huma mfassla għall-awtoritajiet nazzjonali biex ikomplu jqassmu dawn il-materjali lil professjonisti tas-saħħa parteċipanti, bħal prattikanti ġenerali (GPs)/tobba tal-familja, pedjatriċi, ċentri tas-saħħa tal-istudenti, speċjalisti mediċi oħra, infermiera, spiżjara, u edukaturi tas-saħħa. Il-materjali jistgħu jiġu editjati u l-markar jista’ jiżdied.
Il-materjali kollha ġew żviluppati skont oqfsa teoretiċi tal-komunikazzjoni, ġew ittestjati qabel l-użu u tradotti fil-lingwi kollha tal-UE/taż-ŻEE. Il-kontenut żviluppat ġie prodott fi stil li jiżgura li jkun aċċessibbli, attraenti, konċiż u li jista’ kondiviż. Huwa mmirat ukoll biex jissodisfa l-ħtiġijiet u l-aspettattivi tan-nies meta dawn ikunu qed ifittxu informazzjoni dwar it-tilqim.
Id-dokument ta’ hawn taħt jista’ jintuża bħala gwida għall-użu tas-sett ta’ għodod (disponibbli bl-Ingliż biss):
Dan il-pakkett ta’ komunikazzjoni jipprovdi firxa ta’ materjali ffukati fuq kanċers li jistgħu jiġu evitati bil-vaċċini, u għandu l-għan li jżid is-sensibilizzazzjoni dwar kif ċerti vaċċini - bħal dawk kontra l-papillomavirus uman (HPV) u l-epatite B - jistgħu jnaqqsu b’mod sinifikanti r-riskju li jiġu żviluppati tipi speċifiċi ta’ kanċer.
Dan il-pakkett fih:
- Poster dwar il-kanċers li jistgħu jiġu evitati bil-vaċċini
- Fuljett dwar il-kanċers li jistgħu jiġu evitati bil-vaċċini
- Infografika dwar il-kanċers li jistgħu jiġu evitati bil-vaċċini
- Kards tal-media soċjali dwar l-Epatite B & l-HPV
Wara t-tfulija u qabel ma jistgħu jsiru ġenituri, il-persuni spiss ma jinvolvux ruħhom bit-tilqim bħala suġġett (barra mill-emerġenzi tas-saħħa). Madankollu, dan mhuwiex il-każ għal mard relatat mal-ivvjaġġar jew għall-persuni li jattendu laqgħat tal-massa bħal festivals tas-sajf. Dan il-pakkett jenfasizza l-mard li l-persuni jistgħu jiltaqgħu miegħu fis-sajf jew meta jivvjaġġaw u jippreżenta l-għażliet tagħhom għat-tilqim kontra xi infezzjonijiet assoċjati mal-ivvjaġġar u mal-istil ta’ ħajja komuni.
Dan il-pakkett fih:
- Posters dwar l-Mpox, it-TBE u l-ivvjaġġar
- Fuljetti dwar l-Mpox, it-TBE u l-ivvjaġġar
- Infografiċi dwar l-Mpox, it-TBE u l-ivvjaġġar
- Kards tal-media soċjali dwar it-TBE
Il-materjali ta’ komunikazzjoni f’dan il-pakkett huma mmirati lejn il-ġenituri biex jinfurmawhom fil-mumenti ewlenin li jistgħu jiltaqgħu magħhom dwar is-suġġett tat-tilqim – it-tfulija bikrija u l-istaġun ta’ lura għall-iskola. Bħala tali, dawn jiffokaw fuq il-vaċċini mogħtija fl-ewwel ftit snin tal-ħajja u jfittxu li jwieġbu mistoqsijiet komuni, jippreżentaw il-vaċċini għat-tfulija u l-benefiċċji tagħhom b’mod oġġettiv.
Dan il-pakkett fih:
- Posters dwar it-tilqim fit-tfulija u kalendarju ta’ tilqim li jista’ jiġi editjat
- Fuljett dwar it-tilqim fit-tfulija
- Infografiċi dwar l-MMR u t-tilqim fit-tfulija
- Kards tal-media soċjali dwar il-poljo, il-ħosba u s-sogħla konvulżiva
Dan il-pakkett fih informazzjoni komprensiva dwar viruses respiratorji komuni li jistgħu jiġu evitati b’vaċċin li spiss jilħqu l-ogħla livell fix-xhur tax-xitwa. Huwa mfassal biex jikkomplementa l-isforzi mill-awtoritajiet nazzjonali biex jinvolvu lill-pubbliku dwar is-suġġett tat-tilqim qabel l-istaġun tax-xitwa, sabiex jitnaqqsu l-impatt u t-tixrid ta’ viruses bħall-influwenza, l-RSV u l-COVID-19 peress li dawn spiss jidhru flimkien fil-materjali tal-kampanja tat-tilqim.
Dan il-pakkett fih:
- Posters dwar l-influwenza u l-COVID-19, u l-RSV
- Fuljetti dwar l-influwenza u l-COVID-19, u l-RSV
- Infografiċi dwar l-influwenza u l-COVID-19, u l-RSV
- Kards tal-media soċjali dwar l-influwenza, il-COVID-19, l-RSV u l-viruses respiratorji
Il-pakkett ta’ informazzjoni ġenerali jipprovdi ħarsa ġenerali lejn kif jaħdmu l-vaċċini, il-benefiċċji u l-effettività tagħhom. Il-materjali huma faċli biex jinftiehmu u jispjegaw kif il-vaċċini jippromwovu l-immunità fil-ġisem, it-tipi differenti ta’ vaċċini u meta u għaliex il-persuni għandhom jagħżlu li jitlaqqmu. Dan il-pakkett għandu l-għan li jneħħi l-ambigwità mill-konverżazzjonijiet dwar it-tilqim u jippromwovi l-fehim pubbliku ta’ din l-għodda ewlenija tas-saħħa pubblika biex jippermetti konverżazzjonijiet infurmati.
Dan jipprovdi wkoll lill-professjonisti fil-qasam tal-kura tas-saħħa b’riżorsi dwar kif għandhom jersqu lejn u jistrutturaw konverżazzjonijiet dwar it-tilqim ma’ pazjenti li jistgħu jkunu eżitanti jew li jkollhom mistoqsijiet.
Dan il-pakkett fih:
- Posters dwar kif jaħdmu l-vaċċini, il-benefiċċji tat-tilqim, it-tilqim u t-tqala, u s-sigurtà tal-vaċċini
- Fuljetti dwar kif jaħdmu l-vaċċini, is-sigurtà tal-vaċċini, u t-tilqim u t-tqala
- Infografiċi dwar kif jaħdmu l-vaċċini, il-benefiċċji tat-tilqim, u t-tilqim u t-tqala
- Kards tal-media soċjali dwar kif jaħdmu l-vaċċini
- Skedi informattivi tal-professjonisti fil-qasam tal-kura tas-saħħa dwar is-sigurtà tal-vaċċini u l-effettività tal-vaċċini
Filwaqt li jirrifletti l-importanza tat-tilqim tul il-ħajja, il-mistoqsijiet dwar il-boosters u ż-żmien u l-importanza tat-tilqim fil-protezzjoni tal-anzjani, dan il-pakkett fih materjali aktar ġenerali li jwieġbu mistoqsijiet komuni dwar it-tilqim tul il-ħajja.
Dan il-pakkett fih:
- Posters dwar kif il-vaċċini jiġġieldu l-mard u t-tilqim tul il-ħajja
- Fuljetti dwar il-boosters u t-tilqim tul il-ħajja
- Infografika dwar il-boosters u t-tilqim tul il-ħajja
- Kards tal-media soċjali dwar il-boosters u t-tilqim tul il-ħajja