Sraith uirlisí cumarsáide maidir le vacsaíniú
Tá ábhair chumarsáide ineagarthóireachta forbartha ag an Lárionad Eorpach um Ghalair a Chosc agus a Rialú (ECDC) chun feasacht ar EVIP a mhúscailt agus d’fhonn a chinntiú go bhfuil an t-eolas is gá ag daoine chun cinntí eolasacha a dhéanamh maidir le vacsaíniú.
Tá réimse leathan ábhar cumarsáide sa tsraith uirlisí cumarsáide (póstaeir, grafaicí faisnéise, cártaí meán sóisialta, beochan, etc.) agus is é an aidhm atá léi an méid seo a leanas a dhéanamh:
- Litearthacht sláinte maidir le heolaíocht vacsaíní a fheabhsú agus mífhaisnéis agus bréagaisnéis a chomhrac trí fhaisnéis fhíorasach a chur ar fáil.
- Cur le cumhdach méadaithe vacsaínithe in AE/in LEE le haghaidh COVID-19 agus galair eile.
- Tacaíocht a thabhairt d’fheachtais náisiúnta na bPointí Fócasacha Náisiúnta (NFP) agus dá gcumasú.
Tá na hábhair deartha d’údaráis náisiúnta d’fhonn a chur ar a gcumas iad a dháileadh a thuilleadh ar ghairmithe sláinte rannpháirteacha, amhail cleachtóirí ginearálta (GPanna)/dochtúir teaghlaigh, péidiatraithe, ionaid sláinte mac léinn, speisialtóirí leighis eile, altraí, cógaiseoirí agus oideoirí sláinte. Is ábhair ineagarthóireachta atá iontu agus is féidir brandáil a chur leo.
Forbraíodh na hábhair go léir de réir creataí teoiriciúla cumarsáide, rinneadh iad a thástáil sular úsáideadh iad, agus aistríodh go gach teanga AE/LEE iad. Táirgeadh an t-ábhar a forbraíodh ar bhealach lena n-áirithítear go bhfuil sé fáilteach, tarraingteach, gonta agus inroinnte. Tá sé dírithe freisin ar riachtanais agus ionchais daoine a chomhlíonadh agus iad ag cuardach faisnéis maidir le vacsaíniú.
Is féidir an doiciméad thíos (ar fáil i mBéarla amháin) a úsáid mar threoir maidir le húsáid na sraithe uirlisí:
Soláthraítear sa phacáiste cumarsáide seo raon ábhar atá dírithe ar ailsí atá inchoiscthe trí vacsaíniú, a bhfuil sé mar aidhm leo feasacht a mhúscailt faoin gcaoi ar féidir le vacsaíní áirithe – amhail iad siúd i gcoinne papalómaivíreas daonna (HPV) agus heipitíteas B – an riosca a bhaineann le cineálacha sonracha ailse a fhorbairt a laghdú go suntasach.
Tá an méid seo a leanas sa phacáiste seo:
- Póstaer maidir le hailsí atá inchoiscthe trí vacsaíniú
- Bileog maidir le hailsí atá inchoiscthe trí vacsaíniú
- Grafaic faisnéise maidir le hailsí atá inchoiscthe trí vacsaíniú
- Cártaí meán sóisialta maidir le Heipitíteas B & HPV
Sa chuid den saol tar éis na hóige agus sula mbíonn leanaí acu, is minic nach mbíonn daoine ag plé le vacsaíniú mar ábhar (lasmuigh d’éigeandálaí sláinte). Mar sin féin, ní hamhlaidh atá i gcás galair a bhaineann le taisteal nó i gcás daoine a fhreastalaíonn ar ollchruinnithe amhail féilte samhraidh. Leagtar béim sa phacáiste seo ar na galair a d’fhéadfadh teacht ar dhaoine le linn an tsamhraidh nó le linn dóibh a bheith ag taisteal, agus cuirtear i láthair ann na roghanna atá acu maidir le vacsaíniú i gcoinne roinnt ionfhabhtuithe coitianta a bhaineann le taisteal agus stíl mhaireachtála.
Tá an méid seo a leanas sa phacáiste seo:
- Póstaeir maidir le M-bholgach, TBE agus taisteal
- Bileoga maidir le M-bholgach, TBE agus taisteal
- Grafaicí faisnéise maidir le M-bholgach, TBE agus taisteal
- Cártaí meán sóisialta maidir le TBE
Tá na hábhair chumarsáide sa phacáiste seo dírithe ar thuismitheoirí, go háirithe d’fhonn iad a chur ar an eolas le linn na bpríomhthráthanna a d’fhéadfaidís a bheith ag plé le hábhar an vacsaínithe – an luath-óige agus le linn do pháistí ag filleadh ar an scoil. Dá réir sin, díríonn siad ar vacsaíní a thugtar sna chéad bhlianta den saol agus féachann siad le ceisteanna coitianta a fhreagairt, agus ar vacsaíní leanaí agus na tairbhí a bhaineann leo a chur i láthair ar bhealach oibiachtúil.
Tá an méid seo a leanas sa phacáiste seo:
- Póstaeir maidir le vacsaíniú leanaí agus féilire ineagarthóireachta vacsaínithe
- Bileog maidir le vacsaíniú leanaí
- Grafaicí faisnéise maidir le MMR agus vacsaíniú leanaí
- Cártaí meán sóisialta maidir le póilió, bruitíneach agus triuch
Tá faisnéis chuimsitheach sa phacáiste seo faoi víris riospráide choitianta atá inchoiscthe trí vacsaíniú, ar víris iad a bhíonn ina mbuaic le linn mhíonna an gheimhridh, de ghnáth. Tá sé ceaptha comhlánú a dhéanamh ar iarrachtaí na n-údarás náisiúnta dul i dteagmháil leis an bpobal maidir le hábhar an vacsaínithe roimh shéasúr an gheimhridh chun tionchar agus leathadh víreas amhail fliú, RSV agus COVID-19 a laghdú toisc gur minic a dtugtar aghaidh orthu sin i bhfochair a chéile in ábhair feachtais vacsaínithe.
Tá an méid seo a leanas sa phacáiste seo:
- Póstaeir maidir le fliú, COVID-19 agus RSV
- Bileoga eolais maidir le fliú, COVID-19 agus RSV
- Grafaicí faisnéise maidir le fliú, COVID-19 agus RSV
- Cártaí meán sóisialta maidir le fliú, COVID-19, RSV agus víris riospráide
Sa phacáiste faisnéise ginearálta, tugtar forléargas ginearálta ar an gcaoi a n-oibríonn vacsaíní, agus ar na tairbhí agus an éifeachtacht a bhaineann leo. Sna hábhair cuirtear i láthair míniúcháin atá éasca le tuiscint ar an gcaoi a gcuireann vacsaíní imdhíonacht chun cinn sa chorp, na cineálacha éagsúla vacsaíní, maille le cathain agus cén fáth ar cheart do dhaoine an vacsaín a fháil. Tá sé mar aidhm leis an bpacáiste seo cuid den mhistéir a ghabhann le comhráite maidir le vacsaíniú agus tuiscint an phobail ar an bpríomhuirlis sláinte poiblí seo a chur chun cinn d’fhonn comhráite eolasacha a chumasú.
Cuireann sé acmhainní ar fáil freisin do ghairmithe cúraim sláinte maidir le conas tabhairt faoi chomhráite maidir le vacsaíniú le hothair a d’fhéadfadh a bheith drogallach nó a bhféadfadh ceisteanna a bheith acu, agus maidir le comhráite mar sin a struchtúrú.
Tá an méid seo a leanas sa phacáiste seo:
- Póstaeir maidir leis an gcaoi a n-oibríonn vacsaíní, na tairbhí a bhaineann le vacsaíniú, vacsaíniú agus toircheas, agus sábháilteacht vacsaíní
- Bileoga maidir leis an gcaoi a n-oibríonn vacsaíní, sábháilteacht vacsaíní, agus vacsaíniú agus toircheas
- Grafaicí faisnéise maidir leis an gcaoi a n-oibríonn vacsaíní, na tairbhí a bhaineann le vacsaíniú, agus vacsaíniú agus toircheas
- Cártaí meán sóisialta maidir leis an gcaoi a n-oibríonn vacsaíní
- Bileoga eolais do ghairmithe cúraim sláinte maidir le sábháilteacht vacsaíní agus éifeachtacht vacsaíní
Mar léiriú ar an tábhacht a bhaineann le vacsaíniú ar feadh an tsaoil, ceisteanna faoi theanndáileoga agus uainiú, agus an tábhacht a bhaineann le vacsaíniú chun daoine scothaosta a chosaint, tá níos mó ábhar ginearálta sa phacáiste seo ina bhfreagraítear ceisteanna coitianta maidir le vacsaíniú ar feadh an tsaoil.
Tá an méid seo a leanas sa phacáiste seo:
- Póstaeir maidir leis an gcaoi a dtéann vacsaíní i ngleic le galair agus vacsaíniú ar feadh an tsaoil
- Bileoga maidir le teanndáileoga agus vacsaíniú ar feadh an tsaoil
- Grafaicí faisnéise maidir le teanndáileoga agus vacsaíniú ar feadh an tsaoil
- Cártaí meán sóisialta maidir le teanndáileoga agus vacsaíniú ar feadh an tsaoil